MISNEACHD

Chaidh Pràban na Linne a chur air bhonn anns an Eilean Sgitheanach ann an 1976 leis an fhear-ghnìomhachais ainmeil, Sir Iain Noble, airson obair a chruthachadh agus airson fìor uisge-beatha a dhèanamh a dh’aona-ghnothach do Ghàidheil na h-Alba.

Bha Sir Iain mion-eòlach air a’ cheangal eadar uisge-beatha agus a’ Ghàidhlig agus is tric a bhiodh e ag aithris na dhòigh shònraichte fhèin seann sgeulachdan mu na poitean dubha is na gàidsearan. Bha urram ga thoirt don dà chuid an t-uisge-beatha agus muinntir nam poitean dubha anns na sgeulachdan ainmeil aig Sir Iain.

Chuireadh e ris an sgeul is e ag innse gum biodh stòras mòr de dh’uisge-beatha mì-laghail no ‘ionadail’ aig a’ Bhànrigh Bhictoria ann am Baile Mhorail!

AM FEAR-STÈIDHEACHAIDH

Bha lèirsinn iongantach aig Sir Iain Noble, a bha air fear den luchd-gnìomhachais a b’ adhartaiche agus a b’ innleachdaiche ann an Alba, a thug buaidh mhaireannach air saoghal malairt na dùthcha. Bha Sir Iain aig teis-meadhan na h-iomairt airson Dùn Èideann a stèidheachadh mar aon de na prìomh bhailtean ionmhais san Roinn Eòrpa. Bha spiorad daingeann is dàna aig Sir Iain a bha riatanach airson cliù na h-Alba a chur air adhart ann an saoghal na malairt is an ionmhais agus cuideachd airson ginealaichean ùra a bhrosnachadh.

Chuir e roimhe, am measg a chuid iomairtean, gun toireadh e air daoine barrachd ùidh agus suim a ghabhail ann an dualchas Gàidhealach na h-Alba.

A chithear an-diugh aig Sabhal Mòr Ostaig, Colaiste Gàidhlig na h-Alba, aig a bheil cliù eadar-nàiseanta mar Ionad Nàiseanta Cànan is Cultar na Gàidhlig, agus a tha na chom-pàirtiche ann an Oilthigh na Gàidhealtachd is nan Eilean. ‘S e an t-aon ionad san t-saoghal a tha a’ tairgsinn foghlam àrd-ìre tro mheadhan na Gàidhlig a-mhàin.

Choisinn Sir Iain OBE bho A Mòrachd A’ Bhànrigh aig Taigh an Ròid ann an Dùn Èideann mar thoradh air a chuid oidhirpean air leth ann an ath-bheothachadh a’ chànain agus air sàillibh mar a thog e barrachd ùidh, tuigse is meas air cànan agus dualchas nan Gàidheal.

DUALCHAS NA GAIDHLIG

Chaidh uisge-beatha Phràban na Linne a chur air bhonn agus a dhealbhadh le Sir Iain Noble. Chaidh na h-ainmean a thaghadh mar thoradh air cànan agus dualchas beairteach nan Gàidheal.

‘S e Tè Bheag a chanas cuideigin ann an Gàidhlig an Eilein a tha ag iarraidh drama beag uisge-beatha agus b’ e sin a’ chiad uisge-beatha a rinn a’ chompanaidh.

‘S e Poit Dhubh a chanar ri seann stail mhì-laghail agus tha an t-ainm a’ dèanamh luaidh air dualchas muinntir nam poitean dubha agus an cuid sgilean a choisinn cliù dhaibh air feadh na Gàidhealtachd is nan Eileanan. ‘S ann às na poitean dubha a thigeadh, a rèir coltais, an t-uisge-beatha as fheàrr, air an dèanadh sàr-eòlaichean uisge-beatha àrd-mholadh.

Chaidh an t-ainm MacNaMara a thaghadh mar thoradh air dualchas beairteach na mara ann an Innse Gall agus eachdraidh Rìghrean nan Eilean aig an robh rìoghachd mara eadar Eilean Mhanainn agus Eilean Leòdhais eadar na meadhan aoisean agus an 16mh linn.

NEO-FHUARAICHTE

Bha Sir Iain air thoiseach air a’ mhòr chuid air lorg an uisge-beatha as fheàrr agus as ceart gu h-eachdraidheil, agus bhiodh e a’ sìor-mholadh uisge-beatha a bha neo-fhuaraichte agus neo-shìolaichte.

Bha Pràban na Linne air aon de na companaidhean as tràithe sa ghnìomhachas a rinn uisge-beatha traidiseanta neo-fhuaraichte is neo-shìolaichte, a tha a’ cumail ri seann dòighean tarraing agus cuideachd a tha a’ toirt uisge-beatha gu buil a tha uabhasach bog agus sèimh, aig a bheil blas a dh’fhanas sa bheul agus air am bi eòlaichean uisge-beatha air feadh an t-saoghail a’ dèanamh moladh mòr.